MIE GESLOTEN BOZZE.

Kort bie mien weund' een boerezeune
Die rieke was en welgesteld
Ie zocht à jaêren nì een vrouwe
Mie flienk wat land en ok vee geld.
Mè ja, bie oâns ier in de buurte
Dì rocht ie glad nie an de slag
Oewel à ie ier in de de rondte
Toch êêl wat leuke misjes zag.

't Waêren d'r mêêst van errebeiers
Dus kwammen nie van een boer' of
Ze wazzen van een aare kerke
Of dee-en niks an d'r gelôôf.
Ie zat ter vee mie in z'n maêge
En docht: à ter m' êên elpen kan
Dan ê 'k dì best wat geld voe over
Ik schrief de kerkeraêd is an.

Ie kende een paêr ouderliengen
Ze kwammen uut de boerestand
Die konnen kieken in de boeken
Wien à ter boer was mie vee land.
De kerkekasse stoeng mè laêge
Dus kwam wat geld di goed van pas
En in 't register was te vinnen
Welk vrouwspersôôn t'r uuwbaêr was.

Was ze ofkomstig van een oeve
Ie zou dì vee voe over èn
Bie mêêr grond zou ie ok mêêr premie
Voe 't kerkbestuur op taêfel lèn.
De premie was vuufduuzend gullen
Te storten op d'n uuwlijksdag
Mè bie een êên'ge boeredochter
Verdubbelde ie dat bedrag.

De kerkeraêd ei tet besproken
Den domenie was ok d'r bie
Die zei: dat kù je moeilijk maêken
Zòiets, dat mag de kerke nie.
Noe wil je graag d'n uutslag weten
'k Zá 't noe mè zèn, 't is toch verbie
Dien boer ei toch een vrouw' evonnen:
De dochter van d'n domenie.

van de cd: "Eindelienge", 1996

naar Bei Cok

Deze pagina is bijgewerkt op