VELDEKE

1996 nr.4

Limburgse troubadours

Herman Veugelers

Herman woerd in 1937 in Obbicht gebaore oet Limburgse ouwesj. Wae hëöm op zienne verjaordaag 'n kaart wilt sjikke, hooft mer draan te dinke wat op 18 September, de bevrijding van Obbicht, gebuuërde. Wie hae mit zienne pap nao de "dreuvige" (e verkennings-vleegmesjientje) kieëk, zag de pap: "Noe is 't aafgeloupe". En doe: "Verdöld, doe bes jaorig vandaag". Hae deeg de ambachsjoeël, kreeg diploma bankwirker en automonteur, wirkde es sjtaoker bie de Marine, waor doe van alle waere gewesje en gong sjtudere. College Sittard, Rolduc en ofsjoeën e dek ene trui druuëg, waor hae ouch effe gekleid. Hae haolde 't diploma vormingsleider en M.O. pedagogiek. Hae wirkde es vormingsleider aan de Laevessjoeël, docent aan de sociale academie, Klos, Pabo, en is noe nog verbonge aan de Hogeschool Maastricht.
Wie kump Herman aan zienne muzikale achtergrond? Mit 11 jaor kreeg e eine moeënika en sjpieëlde binne twieë waere alle sjlagers (hoeëgtepunt: als de klok van Arnemuiden). Doe wis de mam: dae jong haet talent en goof 'm 't letste financiële duujke vuur 'n gitaar die hae in zienne vrieje tied bieein gesjpaard houw. Noeëts muziekles gehad, dat waor te duur en ze houwe 't neet te breid, en de enige plaatsj woeste muziek kos make waor de hermenie, me dat waor teväöl 'n zoepclub vuur zoeëne jonge jong. Vuur 3 kwartjes lieërde hae 5 accaorde en vuur de res, en dat is nogal get, is Herman autodidact. Noe haet e eindelik les: accordeon van e leef jonk vröwke. Me dat deit e allein vuur zien eige plezeer (dat accordeonsjpieële). Mit 15 jaor sjrieëf en zong hae zien ieësjte leedjes, me mit zien mieë geëngegeerde leedjes begos hae in 't begin van de zestiger jaore. Doer die leedjes op zien gitaar is hae bekind gewoere, leedjes taege de behandeling van Silicoseliejesj, taege sjleting van de koel, taege Afcent, KVP, CD, taege de neutronebom, kerncentrales, taege DSM dat Graathei wilt inpikke, taege mergel- en grindaafgravinge, aanlegk van de Oost-West baan en A 73, taege bedriefssjletinge, Gijsen, Roeëme mit zinge ganse santekraom, taege God en d'r duuvel . Sommige luuj ervare dat es negatief, me hae is gaar neet negatief. Hae kump op vuur de luuj die oetgebuit waere, die ongerligke (behalve bie 't vrieje), vuur ouwere die waere omgepaot, vuur kinger die sjlachoffer zint van hun gezin, vuur Antocha Antonina, Ning Nang, Theresina, Fer Sjrieje, de Boejekuuëning, Nölke Sjmeets en al die anger luuj die in zien leedjes bezonge waere, want die besjtond noe nog ach.
Herman is vuur väöl, vuur Pax Christi, Novib, Memisa, Greun-Links, Derde Waereldwinkels, Bis, pesjtuurs wie Miedema, Wiel Meertens, of Sjaak Meisters dae zich in Brazilie oet de näöd wirkt vuur de allerermste prieje van Rio de Janeiro (woeë Herman zien bieein gezonge geld her opsjikt).
Me dit artikel zou gein rech doeën aan Herman es neet zienne humor vermeld woerd. Hae hilt os wakker, me ummer mit ene glimlach of ene daverende lach, want hae haet 'n sjtum wie 'n klok. 't Is zoeë wie zoeë ene gezellige miensj mit al zien hobbies: zien hinne, zienne gaard, 't tummere, sjrieve, zinge, laeze, goow films kieke, fotografere. Hobbies genog, me Mia blief zien leefhöbberie.
Van häöm zint versjieëne:
-Saneringsroute (LP uuëver aafgravinge)
-Gape taege ene Bakaove (LP)
-EP bie de äöpening van de ROZ studio
-Tekste van de productie "Es de wind] zich drejt"
-Leedjes op de CD "Kerstmis in Limburg"
-Leedjes op de CD "Limburg Greun"
-Ich speur 't weer: Beppie Kraft en Ben Erkens zingen Herman Veugelers
-Boete de productie van "Es de windj zich drejt" sjrieëf hae De heks van Limbricht, woeë van de leedjes ouch op band te kriege zint, hae vertaalde sjtökker van 't Nederlands nao 't dialect, of maakde van einacters e aovendvöllend sjtök (bv. Pitten van Heyermans), vertaalde en bewirkde sjtökker van Molière (De ingebeelde zieke) of van Holberg dae ze de Deense Molière neume (bv. Hendrik en Peril). Wieër sjrieëf hae ontelbare revuetekste, tekste of einacters vuur de kirk, tekste in e katechetetiedsjrif enz. Alles bieein ene miensj woeë dialectminnend Limburg gruuëtsj op maog zin.

Vrie nao Herman. Colla Bemelmans.

terug naar Herman Veugelers

Deze pagina is bijgewerkt op