ZÊELAND, ZÊVERLAND

Mien Zêeland is een êel mooi land
Mêe ruumte, lucht en waoter
Een land mêe dunen, polders, strand
En vee veugelgesnaoter
Zêeland is ook een zêverland
Mee klaogers: vissers, boeren
Z’èn nooit genoeg, bin nooit tevrêe
Altiet wè wà t’ouwoeren

Refrein:
Jao, Zêeland is een klaogersland
Soms een benépen zaogersland
Een doômniesland, een kleuterland
Een stamppot, sla mee spekjesland
Een Schelde- en ontpolderland
Een pontjes die nooit vaorenland
Mao toch het bluuf ons eigen land
Ons vaoder- en ons moederland.

Mien Zêeland is een boerenland
Da zou je ôst vergheten
Elk boerenôf stao tot de rand
Vol caravans en keten
Mêe overà vêe Duitsers in
Die daor as oenders weunen
Vôo flienk wà Euro’s per gezin
Ze vinnen alles schöne

Refrein

Mien Zêeland is een villaland
Mêe uusen groot as kèrken
Of bin die van de Rabobank
Zonder da we ’t merken
Antiek, museums in elk gat
En ’s zomers vêe folklore
Soms zou je wè ’s willen dat
Je dao nie was geboren

Refrein

Mao Zêeland is ook ‘t land van Blof
Van creatieve gêesten
Van paleizen vol mêe stuf
Van festivals en fêesten
Tonêel, muziek, volop cultuur
Laot m’n kritiek verstommen
Het zà mêe Zêeland op d’n duur
Nog wè een kêer ghoed kommen

Refrein

Tekst: Jan Lauret, Middelburg

naar Jan Lauret

Deze pagina is bijgewerkt op