26 mei 2007 |
Provinciale Zeeuwse Courant op het web |
Zêêuwse top vêêrtig
Nae 't lezen van de hoeie column van Matty Verkamman (25 mei) kon 'k de neiging nie bedwienge om ok een stikje te schrieven over de Zêêuwse top Vêêrtig. Natuurlijk wor Bløf gefelicitêêrd. Zebbe 't verdiend en ok aol die andere artiesten. Mer wat a echt Zêêuws is, ik bedoele wat dat de Zêêuwse sfeer en 't landschap uutaedemt, vin ik terug in de liedjes van, en dat bin ik mee Matty êêns, mee die van Anja Kopmels, mer ok van Peter Dieleman en dan mee naeme de buutengeweun môôie liedjes over de twi meeuwen en dat van de Hrenslinden. Je ziet tut as het waere voor je gebeure. De liedjes zouwe in een voorprogramma van de grote Jacques Brel zeker nie misstaen. As ik nae Mijn Vlakke Land luustere, dan voel'k de sfeer van Vlaanderen of Zêêland, die bienae 't zelfde is.
As 'k nae 't liedje van Anja luustere, dan zie'k de Neeltje Jans mee zun op de wind zwevende mêêuwen en dan zie'k oe dat 't licht deur d'r bienae transparante vleugels schient.
As 'k nae 't liedje van Peter luustere, dan zie'k de Zak van Zuud Beveland, a 's ochens vroeg de bomen en de kerktorens boven de nevel uutsteke. Dan bin 'k ontroerd en das de bedoeling ok. Gae 't mee deur jongens en gefeliciteerd!
Wim van Gilst,
Boogerdlaan 23, Kortgene.