nr. 48, oktober 2010 |
De Taolkraant op het web |
Op 5 meert 2011 gaow !REUR!
in Emmen
Net as veurig jaor, op de eerste zaoterdag in meert, is in Emmen het streektaalfestival !REUR! En vanzölf hope wij dat het, net as veurig jaor, een succes wordt. An de programmering zal het niet liggen. Schrievers, muzikanten en dichters oet het hiele Nedersaksische taalgebied kriegt op !REUR! alle ruumte. Hierunder een klein tippie van de sluier.
De meertmaond is streektaolmaond en met !REUR! op de eerste zaoterdag hef de streektaolmaond een mooi begun. Samen met Vocal Music/Bert Kamping, Theater De Muzeval en de Bibliotheek Emmen binne wij as Huus van de Taol alweer drok doende dizze tweede editie van !REUR! te organiseren. Wij streeft naor een evenwichtig programma met bekende en nog wat minder bekende namen oet alle Noordelijke provincies en geschikt veur jong en old.
Ik doe alvast een kleine greep oet het aanbod: De Friese schriever Hylke Speerstra komp veurlezen oet eigen wark, net as Frouk Alice Weijs oet Overiessel. Jan Germs dot een broescursus Drčents, het Dagblad van het Noorden langt de streektaolpriezen oet en speciaal veur de kinder is er een opvoering van de Minpins van Roald Dahl.
In de middag is er muziek in de cafés en 's aovends barst vanof 19.30 uur De Muzeval oet de muzikale voegen. Der bint optredens van Van Wieren, Wia Buze, Erik Harteveld en Boh Foi Toch. En Harm en Roelof vanzölf. Al hadden wij dat wild, die kunden wij niet tegenholden, zo geern wilt die op !REUR! staon.
De activiteiten overdag in de cafés en de bibliotheek bint gratis. 's Aovends kost het € 25,-. En hoewel alles nog niet veur honderd procent vaststiet, zul ik zeggen: koop alvast maor een kaortie. Dat kan via www mijnmuzeval.nl
Ie zult er gien spiet van kriegen!
Anja Schuring