WELTERÖSTE LEEF LIMBURG

Welteröste leef Limburg, sjtrek lekker dien bein
Gank röstig mer sjlaope, in Baek of in Sjtein
Doe sjnoefs waal de geure, mer niks kènt gebeure
Deskundige knape, die hawte de wach
Gank röstig mer druime, sjlaop good, goje nach.

Wae is neet blie, wae is neet blie, mit ós DSM chemie
Doe zuus de gekste höksjkes, mit knöpkes en mit klöksjkes
Doe zous 't 'm haos gaon kniepe, veur al die gekke piepe
Mit al die gekke zake, die ze zeen aan 't krake
Salpeter en lysine, nafta, melamine
Fosfor, polytheen en pek en 't haet ein machtig knaleffek
Fosfor, polytheen en pek en 't haet ein machtig knaleffek

Wae is neet blie, wae is neet blie, mit ós DSM chemie
Rouk dae kump mit wolke, oet de sjouwe kolke
Luuj mit witte jeskes, die loere dao in flesjkes
De duurste ingenieure, die sjtaon dao flink te reure
In zoer en in ureum, fenol en petroleum
Alles löp dao wie gelek en 't haet ein machtig knaleffek
Alles löp dao wie gelek en 't haet ein machtig knaleffek

Wae is neet blie, wae is neet blie, mit ós DSM chemie
In inkele gevalle, kènt 't waal èns knalle
De vlamme sjlaon nao boete, aan sjerve gaon de roete
En alles sjteit te brenne, de operators renne
Ze vluchte veur fosfate, zjwavel, aromate
En urges lik ein rampeplan, mer geine minsj wèt dao get van
En urges lik ein rampeplan, mer geine minsj wèt dao get van

Welteróste leef Limburg, weer hawte de wach
Blief lekker mer sjlaope, druim good goje nach.

1975, 7 november.
De daag nao de ontploffing van naftakraker 11
(14 luuj zeen daobie doeëd gebleve)

Tekst en muziek: HERMAN VEUGELERS

Van de lp "Gape taege eine bakoave" (1982)
en de cd "Hemel en aerd" (2002)

naar Herman Veugelers

Deze pagina is bijgewerkt op