WICHTJE

Zai fietst deur de regen.
Zai fietst deur de wind.
Heur hoaren in toeze.
Zai is nog n kind.

Zai wacht veur n zebrapad
en het Jobs geduld.
Mor elk is de weg kwiet,
van zokzulf vervuld.

n Auto dij toetert
en giert deur de stroat.
t Wichtje schrikt heveg.
Doodsangst om t geloat.

Allain mit de regen.
Allain mit de wind.
Heur hoaren in toeze.
Zai is nog n kind.

n Vinger wiest wildwoest:
woar zit dien verstaand!
t Wichtje wil schraiven goan
en schoeft noar de kaant.

De wereld is wankel
en niks staait meer vast.
t Kind zöcht vertraauwen,
is aine tot last.

Allain mit de regen.
Allain mit de wind.
Heur hoaren in toeze.
Zai is nog n kind.

Toch is zai veul older
as t kind dat wie zain,
komt geestelk achter.
Mor laif as gainain!

t Wichtje fietst wieder
op weg noar heur klas.
Heur buusdouk vol troanen.
Zo kold zunder jas.

Zai fietst deur de regen.
Zai fietst deur de wind.
Heur hoaren in toeze.
Zai is nog n kind.

Tekst: Henk Puister
muziek: Krzysztof Groen

van de cd: Noar de volgende ronde, 2018

naar Krzysztof Groen

Deze pagina is bijgewerkt op