T VERLOPEN WICHT

doar maank gruin van t hogelaand
ligt n boerderij op oostkaant
op wierde dij doar ligt
woar zwaarde moar n priel markeerd
en aanspould klaai veur kop en steert
t hoes zien kleur mit geft
en as ain bie dat hoes laanks reed
din braandt t licht op dat boerenstee
van waarkzoam volk mit wicht
vij mout vouer en doaglieks molken
van kiends of het zai pa mitholpen
zai wordt n vraauw en wil non vot
t waark muit heur, muit heur bot

smörns as zai noar schoul mos goan
was haaistern bie t vij aal doan
eerst mizzen din t hoar
en van aal dat haarde waarken
konst overdag aan heur goud maarken
zai was aaid as eerste kloar
en van ain op aner dag wast aans
heur goud zag zwaart t wicht wol sjans
non hebben wie wat mit elkoar
der wer wat oafsproken ien t café
woar k doustieds waarken dee
kroug laip vol en t wicht was vot.
en dat speet mie, speet mie bot
fietsers van hogelaand noar Daam
woar t wicht ok mit noar schoul tou kwam
dij he’k nog voak bekeken
Aaid bleef k mien wichtje zuiken
K heb uren ien regen noa heur stoan vluiken
n weerzain was nait ien reken
k heb laank wacht op mien vrizze moagd
en voak ok aan aner minsen vroagd
mor zai leek van eerd verdwenen
En fietsers rieden nog aal dij rit
stoaregaan sloug mien denk op wit
zai bestait nait meer en k vuil mie röt.
en dat stak mie, stak mie bot.

Sums rie k zo mor deur heur loug
en drink n klokje ien mien aigenste kroug
woarom was zai zo stil
Mien gedachten zain heur staarke baauw
zai was mien idioale vraauw
ain woarmit ik traauwen wil
Non bin k mit Abraham ien Stad
noflek wat eten, noatied drinken wie wat
Oavend is oareg kil
Den schrik ik op as wie deur Nijstad lopen
Achter t glaas zug k mien laif verlopen
Heur blik is haard en mienent dwirrelt vot
Dit begroot mie, begroot mie bot

Tekst: Eddie Loonstra
Muziek: Edddie Loonstra

van de cd: Aanspould, 2014

naar Roel van der Zee

Deze pagina is bijgewerkt op