meert 2012, |
Dag van de Grunneger Taol op het web |
Wat Aans: Grunneger Hip-Hop
deur Tonko Ufkes
Zingen wil voakt best ien e eigen toal en doarom bruken de mannen van ‘WatAans’ t Grunnegs. Ok al denkt niet elkneen bij Grunneger meziek an Rap of Hip-Hop, twee jonge kerels doen dat gelukkeg wel.
‘Wat Aans’?
Rik Baptist - bijnoam Ingewikkeld - en Teun Heuvel - bijnoam De beunhoas - bennen soamen ‘Wat Aans’ en we moaken Hip-Hop. Dat is n mezieksoort woar ritmisch proat-zongen wordt over gewone dingen.
Hip-Hop meziek en Grunneger teksten, wil dat?
Ien Grunnen dee de ‘Bond tegen Harries’ (met Olaf Vos) t ok, mor veural boeten Grunnen is dizze mezieksoort veul te heuren. n Veurbeeld is Eminem uut Amerikoa en ien t Hollands kin Ali B der wel met deur. Mor wij bruken t Grunnegs; Rik komt van Sapmeer en Teun uut t Zaand, eileks past dan altent t Grunnegs, al zo'n vier joar. We begonnen met t nummer “Haalf stront, haalf reeg'n woater” omdat we zulf ok zo proaten, ha, ha. t Sloeg geliek aan!
Wereldberoemd ien Grunnen?
Ok omdat “Haalf stront, haalf reeg'n woater” n echte hit wer gingen we deur: “Wois ja wel” “In t Zaandt” “Elke dag't zulfde” “Bingo”; dat soort nummers. We moaken meest soamen de tekst en de meziek, dan wordt t opnommen en komt n clip (meziekfilmke). t Wordt op internet zet; op n eigen site en vanzulf op YouTube. Zo gijt dat tegenwoordeg, moest bekend worden, ok deur RTV-Noord, om optredens te kriegen.
Optreden en n CD?
Nee, n CD ien zo'n deuske is der niet, wel hemmen we twee joar terug zukswat moakt mor dat is gewoon te downloaden van ons site. t Is om bekend te worden en te blieven, dat is belangriek! Doarom worden we vroagd, op feesten en festivals hier ien Grunnen. Op Koninginnedag speulen met n groot orkest midden op e Grote Maarkt, kiek, dat waas mooi! En nou weer bij de Dag van de Grunneger toal, ok goed.
Is 'Wat Aans' wat nijs?
We moaken Hip-Hop, meziek van jongeren van nou en we doen nije dingen. Ien e Grunneger meziekwereld bennen we swaarte schoapen, want wat wij doen liekt nargens op, ha, ha. Mor ien de Hip-Hop bennen we ok swaarte schoapen, want we zingen ien t Grunnegs en niet ien t Amerikoans of ien t Hollands. t Is nij, t is 'Wat Aans'!
