30 oktober 2012 |
Dagblad van het Noorden op het web |
Over trolleybuzze en snikke
• Schrijver/dichter Tonko Ufkes laat zijn licht schijnen over de ‘slot-e’
• Van ‘snik’ tot de Snikkevaardersgang en ‘trolleybuzze’
Door Tonko Ufkes
Groningen Ien september wer duudlek dat ien en noar Stad - zeker de eerste joaren - gien tram rieden zel. Mor gelukkeg huven we al laang niet meer met e snik noar Stad; t kin gewoon met e bus, met e trein, met e auto of op e fiets. Dit bennen traauwens oareg stoere Grunneger woorden, lees mor.
Ien e joaren viefteg zongen de Grunneger Minstreels (met Komelis Mulder) over n trolleybus en t is één van e weinege verskes van heur die op n cd stijt. Bij t toalboek Kennismaking met het Gronings van Siemon Reker uut 2007 zit dizze cd en biezunder is dat t verske zongen wordt ien t Stads-Grunnegs. Dan is het dus trolleybuzze met n letter ‘e’ op t ende en niet Trolleybus zunder die ‘e’. Aans as ien t Westerketier en op t Hogelaand komt ien Stad en verder noar t oosten die slot-e veur, ien Veendam kinst eerst op fietse noar t station en dan met traine noar Stad. Wel der eenmoal op verdocht is, heurt en leest doar overal die letter ‘e’ an t ende van n woord!
Vanzulf bennen der grammatica regels moakt, zoals de slot-e heurt bij ‘de-woorden’ en nooit bij ‘het-woorden’. Mor misschien is t oareger om te wieten dat die slot-e al hiel laang bestijt. Kiek ien Stad mor es vlakbij de nije parkeergarage an t Damsterdiep. Doar hiet n stok old stroatje de Snikkevaardersgang; dizze snik voarde duudlek hinneweer tussen Stad en Oost-Grunnen.
