nr. 48, oktober 2010 |
De Taolkraant op het web |
Cd-bespreking
Bert Hadders en de Nozems –
Over De Badde
Over De Badde
Veule Drenten zult wel mit de ogen knippern bij het heuren van de name Bert Hadders, wie is dat dan wel weer? Nou, van oorsprong is het wel een provinciegenoot, want hij is in 't begun van de '60er jaoren geboren in (Drents: Tweide Ekselermond, Gronings: Twaide Mond).
Hij hef daor tot zien achttiende woond en komp uut een boerengezin. Dat was gien muzikantenfemilie, mar hij wordde wel anefieterd umme een instrument te leren bespeulen.
Dat bint de drums eworden en zingen dot Bert tegenswoordig ok.
Hij woont overigens al jaoren in Grunning (Stad), en van die taal hef hij ok veule overneumen. Hij is gien zwaore taalpurist, beide talen komt in zien teksten veur. In een interview met het Dagblad van het Noorden zee hij dat zien moe hum vake waorschouwd har as e niet leren wol, dat hij nog ies puttiesschöpper worden zul. Naodat e solliciteerd har bij een uutzendburo hef hij dat inderdaod twee dagen edaone in Haren en toen hef hij ok metiene zien moe beld.
Bert is een beetie van de 12 ambachten en 13 ongelukken, want hij hef al heel wat soorten wark edaone, circusdrummer en drummer bij een bluegrass band, popband Detour, deejay en platenbaos (Platex). Dat leste is hij nou nog.
Sinds 2002 is Bert Hadders anesleuten bij een songclub in Café Marleen in Grunning, waor ze mit zo'n 12 muzikanten tweemaondelijks bijmekaar komt umme het publiek, mar ok mekaar, de neie nummers te laoten heuren die ze schreven hebt.
Hier bint ok de meeste nummers ontstaone veur de cd Over De Badde (Over de brugge, veur wie gien Knaolsters verstiet).
'Over De Badde' is emaakt samen mit De Nozems, da's een lösvaste band mit as vaste basis: Wyno Bruinsma (gitaar, percussie en zang) en dan nog Johan Viswat (bas en zang); Dim Junius (slagwark); Tiedo (op de Fender Rhodes); Bas Mulder (piano).
Er staot 13 nummers op de cd, die allemaol verschilt van stijl, mar de hoofdmoot is rock-'n-roll. En het bint gien onwieze teksten, daor is wel over naodacht en dat vin ik belangriek. Daorbij blef de muziek natuurlijk de belangriekste factor veur het geheel.
Waor gaot de nummers op Over De Badde over:
Luchiena is een liefdesverhaaltie mit pit, over 't mooiste maagie/wichie van 't Hoge Laand. Trug bie of giet over iemand die zien geluk niet kan vienden.
Bie halve moan is een lied over de verhalenverteller die er eigenlijk zölf ook zat van is.
Woar blift de zummer ofgelopen winter had Bert zo genog van die kolde, dat e er een nummer over schreef, op zien 'goud Grunnens' het is zo fucking cold.
Mien bere is veuls te braid gewoon een goed rock¬nummer mit heufdletters.
Aal mor loater is een lied over 't leven dat al mar deur giet en dat er eigenlijk nog niks van maakt is.
Volluk! giet over het bezuukie van de deurwaarder wat hij kreeg. Tante Dina had 't hum al veurspeld; 'Ie kriegt veul liefde mar nooit gien geld.'
Peperstroat giet over de kroegen van Grunning waor aj oen geld kwiet kunt en veural in die van de pas overleden kroegbaos Sjoerd Kooistra.
Bode van het licht giet over de Jehova's getuge die bij Bert an de deure komp um hum de bliede bosschop te bringen.
Elvis, van de Bunermond is een prachtig country¬rocknummer mit de clichés van het 'Mondenvolk', Friedrich Herder is mien redder.
Zo mui is het verhaal van de allentstaonde vrouw die op de steun zit en an 't ende van de uutkering een stuk maond overholdt.
Zundagmörgen is het relaas van een stel uutgebluste dartigers/veertigers die de zundagmörgen viert asof ze bijna nargens gien zin meer in hebt, kiend op de baanke veur de tv.
Zölfs niet an een karkdienst, poppekast veur 'grote meinsen'.
Sloap lekker is een fantastisch slaopliedtie.
Ien ding wul ik er zeker nog over zeggen: de hoes van de cd Over De Badde is deur Kitty Lolkema vörmegeven as een olderwets Bob Evers-jongensboek, met op de veurkante een schilderij van Kameleon-illustrator George Schriemer.
Dat zet er zo mooi uut, daorveur zuj de cd al kopen. Mar ok de inhold misstiet niet in oen cd-kaste, want al is het in het Grunnings/Knaolsters, het is niet zo moeilijk te verstaon.
Al met al een lekker rock-'n-roll spiegelplaatie!
Harry Boertien
Programmamaker Radio Hoogeveen
'Plaatstaal'
