23 mei 2009 |
Dagblad van het Noorden op het web |
Ik kon noeit kaizen
Naam: Henk Scholte
Geboren: Emmen, 1959
Opleiding: Havo, Lerarenopleiding Geschiedenis (blauwe maandag).
Werk: Consulent van het Huis van de Groninger Cultuur.
Henk Scholte is consulent van het Huis van de Groninger Cultuur. Ook is hij zanger van de Groningstalige band Törf en presenteert hij al vele jaren voor Radio Noord het radioprogramma Twij deuntjes veur ain cent. Voor zijn inzet voor de Groninger cultuur en streektaal kreeg hij onlangs een lintje. Voor de gelegenheid laten we hem aan het woord in het Grunnegers.
Door Mannus van der Laan
Stadsknoal
“Doar bin ik groot worden, mor in Muzzelknoal heb ik mien jongste joaren deurbrocht. Wie woonden aan dat grode knoal. Dat was vanzult slim gevoarlek. Ik bin doar as kind opgruid mit de woorden van mien moe: 'Nait bie t daip kommen!' Ik had aaltied n drang om noar boeten te goan, want ik mos lucht zain. Veur mie was t aan t knoal n klaaine parredies.”
Henkie Prins
“Toon ik negen moand old was is mien pa om t leven kommen deur n motorongeluk op Troapelknoal. Mien moe sprak der noeit zoveul over, want t was n hail pienleke gebeurtenis west. Mien noam was Henk Scholte, moar doarnoa kwam mien moe in kennis met Hinnie Prins. Dat was mien staifvoader. Ik was zo jong, doar har ik gain wait van. t Gekke is dat ik loater in Stadsknoal mien haile leven in cognito leeft heb, want elkain kende mie doar as Henkie Prins. Dou ik in de Stad kwam mos ik der zulf aan wennen dat ik weer de noam Henk Scholte aannemen mos."
Rajakimoes
“t Vrougere jongerencentrum in Stadsknoal. Toon ik in mien bongeljoaren kwam was dat veur mie hail belangriek. Doar heb ik doudestieds van alles mitmoakt, wat mie hail veul culturele bagage mitgeven het. Ik was net n sponze. Ik wol alles mitmoaken. De burgerij sprak der schande over, want der wuiren drugs bruukt, mor doar heb ik nooit aan mitdoan. Ik ging er puur hin veur de fulmclub, veur an discussieavond, veur theater. Alles wat in het alternatieve circuit zat, kwam doar dou."
Törf
“Via talentenjachten kwam ik der in 1976 achter dat der n band was dij in t Grunnegs zong. Dat waren Eddie de Jonge en Alex Vissering mit Törf in Muzzelknoal. Ik heb contact met heur zocht, bin noar n repetitie goan en dou heb k zegd: Ik kin der wel veur zorgen dat joe ain lp moaken kinnen. Om n laank verhoal kort te moaken: Ik bin aiglieks uut nood zanger worden, want ik bin meer n proatert.”
K. ter Laan
“Ik har in Stadsknoal n boantje bie de melkboer. Van mien eerste geld heb ik het Grunneger woordenbouk van Ter Laan gekocht. Dat von ik prachtig. Wie hadden thuus aaltied al bouken in het Grunnegs stoan. Mien opa las groag Grunneger bouken. Dij had ook dichtbundels van Simon van Wattum stoan. Dat sprak mie hail slim aan. Ik heb zien haile verzoameln in kaaste stoan en iedere keer ontdek ik weer nije dingen.”
Koken
“Dat is n grode passie van mie. Als ik dit waark nait doun zol, din har ik misschien wel n restaurant had. Ik heb n kastwand vol mit kookbouken. Ik bin ook slim begoan mit streekproducten. n Slachter mout ik uutleggen dat zien metworst n streekproduct van allure is. Kiek, in de haile wereld kist bie McDonalds eten, Shushi en Döner Kebab, mor veur dreuge bonen mit n binke mout ik noar Muzzelknoal.”
Krödde
“In Drenthe was der n literair tiedschriftje, Róet. t Eerste nummer is presenteerd in café Chantant De Plus van Jan Stelma. Dat von ik hail interessant. Want was t geval? As k optrad mit Törf kwam ik hail voak in aanroaken mit minsen dij ook schreven. Dij gaven mie din n verhoal of n gedicht. Doar was op dat moment hailemoal gain podium veur. Dou docht ik: wat dij Drenten kennen, dat zol hier ook kennen? Een poar moanden loater binnen wie der mit aan de loop goan. Ik bin er groots op, want t is nog aaltied n proefpodium veur aanstormend talent.”
Twij deuntjes veur ain cent
“Dat programma veur Radio Noord dou ik al negen joar vief doagen in de week. Ik heb meer din 2300 uutzendens derop zitten. Ik bin nijsgierig van oard dus van meet of aan heb ik mie ook openstelt veur andere culturen. t Is het globoale dorp van Europa, want ik bin wel Europeana richt. t Is vanzulf n aandere wereld as mainstream. Der zit meer kleur in. Dij bonde boeket bloumen is Twij deuntjes veur ain cent.”
Cornelis Vreeswijk
“Ik heb t geluk had dat ik Cornelis Vreeswijk in de joaren tachteg n poar moanden veur zien dood heb zain optreden in Huize Maas. Hai het n enorme indruk op mie achterloaten. Ik heb zien komplede oeuvre bie mie in kaaste stoan. t Is n man dij ook verschillende gezichten het. Ik ben tekstgericht, dus het ging zelfs zo ver dat ik noar n cursus Zweeds gong om dat te begriepen."
Huis van de Groninger Cultuur
“Dat' is gewoon op mien pad kommen. Doarveur heb ik hail laank in Duutsland waarkt bie de Ems-Dollard Regio. Ik bin aaltied op plekken terechde kommen woar ik mien aigen spelregels uutvinden mos. Der is n soort liene in mien leven dat ik ieder keer miezulf ter discussie kin stellen en perbaaier din om doar weer overhen te stappen.”
Ridder
”Ik heb n allerlaifste vrouw, Jos... nou word ik emotioneel-...dij het dat op gang zet. Ik heb natuurlijk wel wat priezen had, de Wessel Gansfortpries en aander dingen. Mor dit had ik noeit verwacht. Toon ik van school kwam wos ik nait wat ik kaizen mos. Ik von alles interressant. Dat vind ik nog. Dat holdt mie ook schaarp. Joa, dij waarderen van n lintje dut mie wel wat. Ik bin der nog riddersloagen van.”
