16 december 2006 |
Dagblad van het Noorden op het web |
TOALSMAN FRÉ WAIT ROAD
Wichter-cd
'Ain slak dij wol as t immer kon, noar Stad en zulfde dag weerom.' Honderden kiender hebben dit verske leerd bie juffraauw Tempel ien Middelsom. t Verske staait op dij 'nije' dubbel-cd van Damster Wichter. Nou, der is meer. Ien viefteger/begun zesteger joaren van veurege aiw wazzen der ien n Daam drij bekende koren: Damster Wichter mit benoam leerlingen van hoesholdschoul, Damster Jongens, mit leerlingen van Kweekschoul en Damster Beudels, n kienderkoor. Dirigente was Gien Smith- Bouman. t Wichterkoor was t bekendst. Grunneger laidjes wazzen gedichtjes van Renko Sipkes en Jo Rietema en op meziek zet deur Gien Smith-Bouman. Loater kwam Tilly de Jonge-Prenger der nog bie as tekstschriever. Solisten bie t koor wazzen: Elly ter Borg, Jopie Kugel, Henny Bijl (Imca Marina) en Ineke Houwerzijl.
Ik belde Ineke Reker-Houwerzijl op dou zai krekt aan t boukwaaitengort eten wazzen. Nou dij cd mit aal dij olle laidjes weer vannijs oetkommen is, komt der weer n bult bie heur boven: "Ik zat nait op hoesholdschoul en nait op kweekschoul en toch op Damster Wichter. Hou dat kommen is? Ik zat op viefde klas en dou was der n kwekeling dij Cees Briek haitte. Hai von dat ik mooi zong en gaf dat aan Gien Smith-Bouman deur. Ik heb eerst bie Beudeltjes zongen en n poar joar loater kwam ik bie Wichter. t Was n gezelleg koor. Der zaten zo'n zestien wichter op." "Dirigente was streng, wie mozzen woorden dudelk oetspreken en dat aalmoal ien t Grunnegers. Ien dij tied prouten wie sikkom aalmoal nog Grunnegers. Oetsproak was nait aaltied makkelk, dat heur je ook op cd. 't Is prachteg dat t bewoard bleven is. Ik heb map nog mit aal dij laidjes en ook van baaide kienderoperettes 'Rabbel en Snorrepot' en 'Hompie Gompie Gakkerak'. Teksten van Tilly de Jonge." t Zol mooi wezen as aal dij teksten ook nog ais ien boukje oetgeven werden. Din kin je mitzingen. Cees Briek woonde doudestieds ien Broerstroat ien n Daam, noast synagoge dij dou bruukt wer as vrijgemoakte kerk. Zien ollu hemmelden dij kerk. Harmonikoa speulen was zien laifhebberij. Voak kon men zien muzikoale klanken heuren ien t sentrom van n Daam. Cees ging noar kweekschoul en zong dou zulf bie Damster jongens. Dou hai onderwiezer was, vervoarde hai noa Oude Tonge. Hai is vrijwilleg mitwaarker bie Radio Flakkee. Dou hai ale kooropnoames van Gien Smith-Bouman aarfde wis hai wel wat hai der mit doun zol. t Materioal is opklanderd deur n geluudstechnicus. En zo dounde is t spul vannijs oetgeven. Prachteg. En nou aan t zingen, mor 'Of slak ien Stad kwam, wait wie nait, want dat staait ja nait ien dit laid'.
Bie vroagen, road en zo: fcschreiber@hetnet.nl
