20 april 2005 |
Nieuwe Ooststellingwerver op het web |
„Dag, Stellingwarvers!" komt vri'jdag uut
Stellingwarfstaelige cd van troubadour Henk Bloemhoff
BERKOOP - Onder de titel ,,Dag Stellingwarvers!" verschient kommende vri'jdag de alderni'jste cd in et Stellingwarfs. De cd telt vieftien Stellingwarver lieties van Henk Bloemhoff, mit mitwarking van Sietske Bloemhoff en eren. In et gebouw van de Stellingwarver Schrieversronte wodt et eerste exemplaor aovens anbeuden an Bettie Bakker-van der Heide uut Westervelde, wedevrouw van de schriever Jouk.
Dat het d'r mit te maeken dat et eerste nommer op de cd ,,Waor de Lende" is. De tekst van dat bekende lied wodde in de vieftiger jaoren schreven deur Jouk, Wiels Henk Bloemhoff et laeter op meziek zette. „De melkster", een aander bekend gedicht van Jouk, op meziek van Bloemhoff, staot d'r ok op.
Henk Bloemhoff (56) raekte halverwege de jaoren zestig onder de indrok van et poëtisch-indringende geland van de Schotse zanger Donovan en van de Amerikaanse zangers Bob Dylan en Joan Baez. Hi'j speulde en zong zels al gauw Donovan- en Dylan-lieties en aandere folk, zoal die uut de Angelsaksische wereld anwi'jen kwam.
Nao de eerste perbeersels in de schrieveri'je kwam hi'j riekelik gauw tot eigen liedteksten en meziek. Mit zien eigen lieties en die van Boudewijn de Groot en meer zokken gong de Stellingwarver troubadour al gauwachtig de Nederlaanstaelige kaante uut. Mit Zokke meziek was hi'j nogal es te heuren in de twiede helte van de jaoren zestig en de eerste helte van de jaoren zeuventig: op folk-aovens, in folk-kefés, op kulturele aovens, schoeleaovens en telentejachten.
Radiopergrammes
Omroep Frieslaand vreug him in die tied om es wat Stellingwarver lieties veur heur uutzendings te zingen. En daor kwam weer uut vol dat hi'j vraogd wodde om een negental Stellingwarver radiopergrammes te marken. Tegere mit aandere, meerst jonge Stellingwarvers maekte hi'j in 1971-1972 et pergramme „Op 'e schostienmaantel". Henk Bloemhoff was ok mit de drievende kracht aachter et kabberet- en revuegezelschop ,,Et Harbargespul". Ok daorin wedden tal van Bloemhoff-lieties zongen.
Op 'e cd is niet alliend de zang van Henk Bloemhoff te heuren, mar ok zien gitaarspul en et speulen op 'e mondharpe. Zien zuster Sietske Bloemhoff (50) komt uut etzelde muzikaole nust. Op 'e cd speult zi'j fluite en monieke.
Langspeulplaeten
Sietske Bloemhoff speulde niet alliend een belangrieke rolle in de muzikaole begeleiding van heur breur, mar ok bi'j de produktie van twie langspeulplaeten. In 1977 verscheen ,,Singeliers'', Stellingwarver lieties van Henk en Sietske Bloemhoff en in 1980 „In Twielochten".
Op 'e ni'je cd staon een protte bekende, mar ok wat minder bekende nommers. De cd gaot 14,95 euro kosten en leit rondom in de winkels. In Stellingwarf zal de cd ok in de boekwinkels te koop wezen. De eerste oplaoge is 500.
De cd wodt uutgeven deur JAZ Music Liwwadden, die veurig jaor de succesvolle dubbel-cd mit „Stellingwarver Stiekelstokkies" van Johan Veenstra uutgaf Van die cd bin now al 700 verkocht, Wiels de eerste oplaoge 500 stoks was. Et hoesontwarp van „Dag, Stellingwarvers!" is van Albertha Bloemhoff uut Oosterwoolde. Van de vieftien nommers, bin negen nommers produkties van Omroep Frieslaand en zesse bin opnaemes in de studio van Jan van der Linden in Noordwoolde uut de tiedrekte 2001-2004.
