naar Streektaalprijs Dagblad van het Noorden
Deze pagina is bijgewerkt op
TOAL EN TAIKEN
TIEDSCHRIFT VEUR GRUNNEGER KULTUUR
29e JOARGANG - NUMMER 2
MEERT/APRIL 2011
Streektoalpries 2010
Op zotterdag 5 meert binnen in de bibeltaik van Emmen de Streektoalpriezen van t Dagblad van het Noorden over t joar 2010 oetlangd. Dat gebeurde tiedens t streektoalfestival !Reur!, dat veur twijde moal in Emmen holden wer.
Jury haar t nait makkelk mit de beoordailen. Ook al was der wat minder aanbod as n joar eerder, t blift stoer te vergelieken. Dichtbundels tegenover lesbouken, verzoamelbundels tegenover kinderbouken en wat de cd's en dvd's aangait: van schrieversportretten tot landschopsbeelden, van Grunneger Brahms tot vertoalde jazz en Bert Hadders en de Nozems. Daniël Lohues brocht zien vaaierde spaigelploat in de serie Allenneg oet en wer omdat e al twij moal wonnen het, 'hors categorie' beloond tuit n 'Heurkonde'.
Noa langdureg beroad het jury aindudeg besloten dat t originele waark van de Drentse dichter Martin Koster beloond worden mos mit de pries van € 1001,-. Orgineel en verfrissend, zowel wat thema's as toalgebruuk aanbelangt.
In de aander categorie kreeg nait n muziek-CD de eerste pries, mor de oetgebraaide, professionele DVD Wiede leegte mit Daipte van de Stichting Oldambt. Veuraal vanwege de veulziedghaid van t product, mit mooie landschopsbeelden, mooie meziek, integere vroaggesprekken, biezundere aandacht veur toal, geschiedenis en landschop van n biezunder dail van pervinsie Grunnen. Hoofdredacteur Pieter Sijpersma interviewde ale genomineerden en juryveurzitter Harm Evert Waalkens (boer te Finnerwold en veurmoaleg Twijde Koamerlid veur de PvdA) sprak t juryrapport oet. Waalkens volgde in dizze functie journalist Joep van Ruiten op. Jury beston wieder oet Jur Engels (cultuurmitwaarker van gemainte Laik en ook redacteur van Toal en Taiken), Martin Hillenga (streektoalfunktionoares in pervinsie Grunnen), Janny Kuiper (jeugdbibliothecaris in Emmen) en de Drentse schriever Gerard Stout (ook al eerdere winnoar van de pries).
Noast de Drentse dichteres Delia Bremer trad ook de Grunneger zanger/gitarist Harry Niehof (ook n eerdere winnoar) op.
naar Streektaalprijs Dagblad van het Noorden