VELDEKE

jaargang 77
februari 2002

TÉJATER, de nuuj CD van Laur Rutten

Viertieën (14) loesterleedjes, gezónge, gesjrieëve en gesjpieëld doer Laur Rutten, noe mit mitwirking van 'n aantal familielede, Arno op den Camp en Henk Steijvers. 't Is geine behangmuziek, meh 't zint leedjes vuur nao te loestere en kómme baeter tot zien rech in de intimiteit van de hoeskamer, 't klein theater of b.v. op. Veldeke-aovende.

Soms hieël versjtild, 't loestere nao de sjtilte, dan weer mit e lekker ritme. Ofsjoeën hae dèkker truukgriep nao vreuger of romantiek (de maaskant, de zölder van vreuger, de maon, 't doevemenneke), zint d'r genóg tekste die laote zieën dat hae critisch in 't laeve sjteit ("facade en glitter dat hèt allewiel gelök" of "daen iezere jas op raoëjer mit de sjnelwaeg es zien buun" of "sjat zal vier es effe chatte").
Doerdat hae sommige wuurd soms trèkt en d'r typische Eysdense wuurd in sjtónt wie moijle (praten), glaoëzer (glazen), sjmaoëk (smaak), zint sommige wuurd vuur neet-Eysdenaere soms neet good te versjtaon. Gelökkig is vuur die gevalle e tekstbeuksjke d'r bie.
Zien leedje "Sjtum" sjtóng vlak naodat de CD oetkaom al in de Limbo top 10 van L1. 'n Lekker CD óm te höbbe, of wie gedeputeerde Martin Eurlings in 't vuurwoerd sjrief: "Daoróm is zien derde CD 'ne knuffel veur ederein dae Limburg leef haet".
Productie: Jos Laumen Limbo Music Sittard

Nut, Colla Bemelmans

terug naar Laur Rutten

Deze pagina is bijgewerkt op