DAT BISTOE

as geul achter waddendrek
dij stroomt noar verre kim
zo daip, zo vol gevoar
trekkend aan boaken, ongedureg
ver vot van daip en moar

as lichtjes van stad bie naacht
zain vanoet t duustere laand
zo vol belofte, zo vol leven
mit n golden gloud, woar elk en ain hen wil
elk en ain, al is t mor even

dat bistoe

as wrede wolkenlucht
boven leeg, eerbiedeg laand
zo onberaaikboar, zo dichtbie
mit haarde regen, felle zunschien
al is dat nooit specioal veur mie

dat bistoe

joa, doe wenkst mie
mit alles wastoe hest
mit dien ogen, mit dien lach, mit dien lief
den lopstoe vot en nemst mien haart mit
terwiel ik zunder die achterblief

dat bistoe

Tekst: HARRY NIEHOF

van de cd-single: Dat bistoe, 2006
en de cd: Straks is t weer janken, 2007

naar Harry Niehof

Deze pagina is bijgewerkt op