IK LIEK ZOVEUL OP DIE


Pa as ik ains rusteg bie die zit, din gai k ons baidend vergelieken
en din vaalt t nait aaltied mit om eerlek noar miezulf te kieken.
Aaltied heb ik docht dat ik het minst op die leek,
mor dat t meer is din mie laif is, da's wat loater bleek

n Einzelgänger bin k, da's dudelek, net as die
en ook dien haarde waarken paast doar wel bie.
Geld verdainen doun we groag, om de schöstain te loaten roken
en wat der overblift wordt in n olle sokke stoken

Pa ik liek zoveul op die, ik liek verrekt veul op die.
Dat was nait aans din te verwachten,
mor nait op alles heb k stoan te wachtent
Mor ik liek zoveul op die, zo verrekt veul op die.
Dus hol ik die aaltied in gedachten en blief k veul lieken op die.

Wie zeggen nait aaltied veul, mor t koppie moalt mor deur.
Din holden we gedachten veur onszulf en dat geft voak gezeur.
t Lontje is kört, veul geduld hebben we noeit had
wenneer t nait gait zoas we willen din binnen we t gauw zat

Zeggen was t op dien haart hest dat dust doe nait groag
en dat is nou perzies woar ik miezulf voak mit ploag
Complimenten van die heb ik as kind hail voak mist.
k Was bliede van die te heuren das t trots op mie bist.

Pa ik liek zoveul op die, ik liek verrekt veul op die.
Dat was nait aans din te verwachten,
mor nait op alles heb k stoan te wachtent
Mor ik liek zoveul op die, zo verrekt veul op die.
Dus hol ik die aaltied in gedachten en blief k veul lieken op die.

Tekst en muziek: Bé Schmaal

van de cd 13 bie 60, 2019

terug naar Bé Schmaal
Deze pagina is bijgewerkt op